一早起身，都係出露台睇下沱江情況，今日終於有水啦!! 但可惜今日係旅程的最後一日，中午時間我地就要座車返張家界，搭晚機返深圳了….
今日行程係同友人們逛鳳凰，有水的沱江比乾塘的靚好多!! 我地一行5人一齊影左好多相，係鳳凰古城行下走下，好快就到下午了….
走既大家都好依依不捨呢，這次相聚後，都唔知几時先有機會再見呢…
約莫五個小時的車程，回到張家界市，尚有小小時間，就去超市買小手信，同埋去左間叫”湘渝火鍋” 打邊爐，啤酒加火鍋為呢個旅程劃上完美句號。
不過，去機場時發生一個小小插曲，的士司機竟然搏矇唔起標，原本七八蚊既車程，想屈我地三十蚊!! 不過我地趕時間，唔係實同佢玩大佢，擺低廿蚊，唔理佢就走!! 唉，旅程差唔多完，心情放鬆左，就咁中招!!
約12點半返到深圳機場，白牌去黃崗返香港，今次旅程就正式完結了。
後感~謀事在人、成事在天
今次旅程其實都几黑仔，張家界，睇山無山；鳳凰，睇水無水…深深感受到「謀事在人、成事在天」的道理….
其實張家界几靚，好值得去，只係我地唔好彩，天氣差，有機會要去多次呢。但要睇張家界既美，一定要去d一般旅行團唔會去既地方，例如楊家界、天子山老屋場既景點。
至於鳳凰都值得到此一遊既，但預一天到兩天既時間就足夠，當然如果係對沈從文等別有興趣，就可能要預留多d時間了…但晚上虹橋附近的酒吧都几嘈，同古城格格不入呢。
P.S. 打呢段遊記時，剛從川西回來，丹巴的甲居藏寨，才能夠感受到古城應有的味道!!
鳯凰古城
Day1 Day2 Day3 Day4 Day5 Day6
0 留言:
發佈留言