早上起身，第一個高原晚上訓得好好，而且發覺今日天氣變得好好，終於見到藍天白雲!!
座車入稻城個兩日既天氣都好差，係我擔心緊既時候，小貓好有信心咁同我地講，去到稻城天氣一定會好，估唔到真係俾佢講中~
但幸運既小貓，琴晚無著夠衫，感冒了…另外劉濤的高反仍然好厲害，結果今日第一個景點，就係稻城醫院….小貓和劉濤都要吸氧氣同打點滴，無緣去睇雄登寺既開光…
送左佢地去醫院後，餘下四人就去左附近食早餐，返旅舍出發時，遇到一個感覺財大氣粗既人，原來佢就係旅舍既老闆，係廣東人，今日佢地都會去雄登寺。後來先知，稻城好多青年旅舍、酒店，都係外省人開。
雄登寺係稻城東北面的一座山上，我地包左一架面包車，沿之字型既土路上山，途中見到好多藏民都係一家人一齊徒步上山。同車既除左我地之外，仲有兩個旅舍既義工，聽佢地講係旅館做左三個禮拜，都未有機會出去玩呢，同埋佢地好似几唔鍾意個老闆…睇黎做義工都未必係咁開心呢…
去到雄登寺，最先吸引我地，係從山上遠眺既稻城。一遍白色既房子，就建係群山包圍既平原上，加上反映藍天既河流、黃綠色既青楊林…..一切都太靚了
返回雄登寺，己經聚集左好多藏民、旅客，同埋見到好多喇嘛。由於呢次係好隆重既開光大典，好多藏民都盛裝出席。
首先大喇嘛出黎講野，跟住就係d宗教儀式，之後藏民就開始托米大行動，每個人都托著一大袋米上個大殿。有位藏民問我地托唔托，話托完就可以得到祝福，我地試過托上膊頭，真係好重。結果我地驚托到高反，就婉拒了…而家諗返起，應該几大都托，呢d機會未必會再遇到….
之後我地聽到話下午既表演節目 － 跳神、吹奏、服裝表演都取消左，所以就決定離開。但後來聽其他驢友講，原來無取消到，我地俾人fake，錯過左咁難得既機會….
從雄登寺遠眺稻
雄登寺
藏民
藏民小女孩
雄登寺
驢友拍的: 雄登寺藏傳佛教黃教教徒
驢友拍的: 跳神．雄登
中午返到稻城，解決午餐後就出發去傍河、色拉，但劉濤同小貓情況都係麻麻，所以留係旅舍休息，靜姐就同我地一行五人出發了~其實好多人會選擇踩單去傍河、色拉，但因為我地只得一個下午，所以選擇了包車~
網上流傳有名既係「傍河夕照」、「色拉晨霧」，所以我地先去色拉，之後去傍河睇日落。
其實呢兩個地方，我都唔係分得好清楚，只係車去到邊，我就係個到行下影下相。而且傍河、色拉又唔係話真係好靚，不過就有好多可以影相既題材，好似青楊林、小溪、馬、紅黃葉，而且逛得比較悠閒，可以用心咁影下相，所以影到好多滿意既照片~
最後係傍河等日落，但我搵黎搵去都搵唔到一個影日落的好地方，不過日落時都開始好多雲，所以就無咩所謂了。
返到旅舍，劉濤情況仍然唔樂觀，要繼續休息，聽日都未必入到亞丁。反而小貓就無咩事，仲去左探訪藏民家，同d小朋友一齊上山玩，睇番佢d相，小朋友都好天真無邪，玩得好開心呢。
係旅舍閒聊時，Ted兄話女朋友鬧分手，聽日就要趕去上海箍煲，唔去亞丁…佢就係咁，座兩日車入稻城，玩一日，就趕車去香格里拉，再趕飛機….佢好似係黎搭車多過黎玩…
之後，有人用廣東話同我地搭訕，原來佢係澳門人，叫阿奇，話有興趣join埋我地聽日一齊去亞丁，剛好可以替補Ted兄~
晚餐後，小貓建議去Salon洗頭，我地一致贊成，因為自己洗頭好麻煩，好難乾，又驚會感冒~
之後返旅舍確認埋聽日既行程，就早d休息準備聽日期待己久既亞丁之旅，但晚上又覺得有d頭痛、頭暈，驚高反又唔敢沖涼，加埋聽日住沖古寺都無得沖涼，第一次三日無沖涼呢….
色拉、傍河．稻城
前言 Day0 Day1 Day2 Day3 Day4 Day5 Day6 Day7 Day8 Day9 Day10
0 留言:
發佈留言