好幸運，今日天氣仍然好好，可以係藍天白雲之下，踏上期待已久的亞丁之旅~
劉濤休息一晚情況好左，都決定一齊入亞丁，浩浩蕩蕩的「大班七人團」又再次出發了~
約九點座車去亞丁，途中經過傍河、色拉及翻過一個不知名埡口，就到達日瓦鄉的景區門口。大家各自攞出與年紀不相稱的學生證，成功買到$80的學生票。
之後就要改搭「環保車」進入景區。呢架「環保車」好「略水」，來回要成$120。其實之前，遊客包車係可以直接入景區。但而家就用環保既名義，強迫遊客一定要座景區既車，但我睇黎睇去，都睇唔出架「環保車」同普通大巴有咩分別…而且班次又小，我地等左半個鐘先上到車，白白浪費時間。
「環保車」沿之字公路爬山，轉左數個急灣後，雪白的仙乃日神山，突然就映入眼簾，加上山坡上的紅黃葉，實在太美了!! 而且，黎得實在太突然，諗唔到咁快就可以睇到亞丁的美!
突然映入眼簾的仙乃日神山
之後「環保車」經過一個觀賞仙乃日既觀景台，但司機完全忽視全車遊客的要求，就咁駛過...之後去到一個可以同時觀賞到仙乃日、夏諾多吉和亞丁村的觀景台，司機終於應遊客的要求，停車俾遊客影相，但只過了數分鐘，司機就催趕離開... 其實好多人，一世人可能只會黎亞丁一次，俾我地停留多几分鐘都唔得...? 唉...$120的「環保車」......
「環保車」之後到逹亞丁村，同行的其中四人落車安排住宿，我、友人和小貓選擇住係沖古寺，想係零晨行上牛場睇央邁勇的日出。過左亞丁村，就到達龍同壩，呢到同樣有食宿點，係到解決左午餐後，就出發去沖古寺了。
由龍同壩步行去沖古寺一般需要一個小時，我地帶既行李比較多，選擇左騎馬，但騎馬只去到扎灌崩，下馬後步行十多分鐘先去到沖古寺。雖然只係短短十多分鐘路程，但大部份為上坡，加上沉重既背包，初次感受到高原徙步的艱苦，基本上走十多分鐘就會因氧氣不足而喘氣...
去到沖古寺，搵到一早預約好既藏民夫婦佣忠同多吉，今晚會去佢地既屋企住一晚。去到多吉家，算可以接受，因為本來就無乜期望，只係搵個地方過一晚...
執拾行李時，重遇番係雄登寺遇到既兩個香港女仔，佢地仲帶埋一個韓國人上黎，都會住係沖古寺。之後我地三人同韓個人一齊行去珍珠海。
係沖古寺去珍珠海約需要四十分鐘，係舖得好好既木棧道，好易行，不過全程上坡，都几辛苦。小貓因為高反，行得好慢，反而韓國人就越行越快，而且佢只係著住件t-shirt，而我地著几件衫包到實晒都仲覺得凍...
我自己一個人一馬當先行上去，首先見到既係仙仍日，跟住向右轉，行多幾分鐘就見到仙乃日下的珍珠海。原本，珍珠海最大的看點，係仙乃日的倒影，但可惜天公不造美，山頂好大霧，睇唔到... 等左一陣，d霧都無乜想散既跡象，就唯有落番去沖古寺，希望睇到另一座雪山，夏諾多吉既夕照金頂。
去到沖古寺草坪，夏諾多吉的頂峰情況好好多，完全清楚可見，而且每次有雲霧想遮住頂峰時，就好像有一道風將雲霧吹散，直至整個夕照金山完結！！遺憾的是，小貓高反太厲害，要留在多吉家休息，睇唔到呢感動既一幕...
太陽落山後，天氣凍左好多，而且摸黑返去，差d蕩失路呢。去到多吉家，發覺多左好多人，原來今晚有差唔多十五人會住係到！而且，大部份人都想零晨行上牛場睇日出，同我地不謀而合~
食完多吉為我地準備既晚飯，休息一陣，某位廣州黎既影友，提議去草坪到影星，我好爽快就答應了，因為我都有咁既打算~
一行三人，又再次摸黑行返去沖古寺草坪。當晚天空無乜雲，所以天上既星星又多又光，同行既影友仲睇到流星！而若隱若現夏諾多吉，就成為最好的前景！！影星星最慘就係等既時間，係接近0度既氣溫，呆等半個鐘，只係為左一張相，如果影到當然值得，但可惜我影唔到...
影完相，返番去多吉家，約好聽日四點半，由多吉帶我地出發去牛場，就訓了~~
觀景台上的仙乃日、亞丁村
珍珠海
夏諾多吉
夕照金山的夏諾多吉
前言 Day0 Day1 Day2 Day3 Day4 Day5 Day6 Day7 Day8 Day9 Day10
0 留言:
發佈留言