我地選擇係沖古寺住宿的最大原因，就係想零晨步行上牛場，睇央邁勇的日出，一睹日照金山！！
零晨四點起身準備出發，多吉一早起身為我地準備稀飯做早餐，真好呢！由多吉帶領，一行十多人就出發去牛場了~ 由沖古寺上牛場的一段路好易行，係電瓶車行的水泥路，基本上只係一條路，自己行應該都唔會迷路。但一直都係上斜，加上高原氧氣不夠，都有d辛苦。
行左大概四分三路程，翻過一個小小的埡口，漆黑既夜空，路的盡頭，突然映入眼簾的，就係會發光既央邁勇!! 雖然仲未天光，但雪白既央邁勇，反射月亮光，對比起旁邊既山，顯得特別光，特別雄偉，而且之後既路，基本上都係望住央邁勇步行。這一段路，係整個旅程最深刻既一段!!
行下行下，天就開始光了，但可惜央邁勇的頂峰俾雲霧包圍住，只可以見到山腰部份的日照金山...而且之後成日d雲霧都無散過，係今次旅程既最大遺憾呢...
沿住牛場既棧道行，去到終點就係特種馬售票點，休息一陣，發覺後面既遊客，晨早流流，喘晒氣咁跑住趕過黎，原來佢地要搶住買特種馬馬票！！
見到咁既環境，我地都即刻商量下，要唔要騎馬入牛奶海，我自己就想徏步入去，咁先有feel，但小貓同聲都想騎馬，驚太累，而韓國大叔就豪無猶疑，就話一定係行入去。當我地猶疑緊時候，有一個團隊，一次過買晒餘下既全部馬票，後面趕黎既人都呆左，而我地都唔駛煩，一定要自己行入去~
牛場入珍珠海的途中
去珍珠海既路，開頭係面向央邁勇步行，比較平坦，路況都ok，只係有部份俾馬踐踏過，比較爛。但我係第一次高原徒步，所以都行得好辛苦，走一段路就已經好喘氣，而阿聲既表現更不滯，佢既氣管好似適應唔到高原既冷空氣，反而小貓狀態就最好，仲可以幫我地拎埋行李!!。
之後行近央邁勇之後，就要開始上斜，要翻過央邁勇同仙仍日中間埡口。呢段路，我地走得仲辛苦，上斜行唔夠十步，就要喘氣休息，阿聲仲有點呼吸困難。去到埡口時，d風仲要又凍又勁，差d人都俾佢吹倒。几勁辛苦，我地終於翻過過埡口，看到天藍色既牛奶海，大家都好激動！！如果我地選擇左騎馬，一定感受唔到呢種喜稅～
牛奶海呀!!
係牛奶海影完相之後，下一個目標就係五色海。問下ｄ馬夫，原來係馬站旁邊一個斜坡上面，翻過去就會見到。我二話不說，唔知係邊到黎既力氣，就咁垂直行左上個斜坡，當我一邊下一邊搵路時，突然有一名少女係我側邊輕鬆行過，我先發現原來係有一條小路，緩緩上山，可以唔駛行得咁辛苦！！小貓同阿聲都跟我一齊咁行，結果俾佢地罵左好耐...
去五色海途中，回望既牛奶海好靚，後尾先知，係牛奶海旁邊條斜路回望既牛奶海仲靚！！
這個度角既牛奶海好靚~
几經辛苦，我地終於去到五色海，可能陰天既關係，睇唔到五種顏色，又一遺憾呢。因為要趕住今日返稻城，我地逗留左一陣就要落山。落山既一段路，我開始適應高原既呼吸方法，仲可以越走越快，但小貓同阿聲就唔多掂了...
五色海
大約下午三點，我地返到牛場既起點，計一計我地己經連續行左十個小時，漫長既一天呢...阿聲同小貓都顯得好累。另外，我地原定去完亞丁之後，會去貢嘎西南坡徒步，但阿聲去完牛奶海，知道自己既體力有限，決定放棄去貢嘎... 雖然我一直都好想去貢嘎，但為左共同進退，我唯有選擇放棄...
係牛場既電瓶車有好多遊客等車，等左差唔多一個鐘先上到車，短短15分鐘既車程就去到沖古寺，返多吉家攞行李，見到今晚又有好多人係到住，生意好好呢~
之後騎馬落番去龍同壩，但行落山既韓國大叔話等左我地15分鐘!!!跟住，就搭「環保車」去日瓦鄉，係景區門口會合其他人，併車直接返稻城，約晚上八時返到。
係車上先知道，原來劉濤去到亞丁村情況更加惡劣，出現小小高山肺水腫情況，琴日仲要連夜包車送返去海拔較底既日瓦鄉，否則會有性命危險。好彩既係，日瓦鄉既醫生比稻城的更專業，及時治理下已經無咩大礙，但要繼續留係日瓦鄉休息。
我地聽完，都俾佢情況嚇親，同「鄧」佢唔抵，難得出黎旅遊，但只能夠係醫院渡過...亦都好慶幸自己出發前，做好高山反應既準備。
返到稻城，原定既頁嘎穿越去唔成，就要開始研究下之後既行程，有三個景點可以選擇:
1. 康定木格措
2. 海螺溝
3. 丹巴藏寨
木格措，因為己經睇左牛奶海、五色海，興趣不大。海螺溝，太商業化，同埋睇唔到貢嘎主峰，唔揀。丹巴藏寨，比較休閒，啱晒辛苦完既我地，同埋小貓好熱愛西藏文化，去藏寨住，佢應該會好開心。
之後就要安排交通，剛好旅舍黎左一團人，佢地包既車要返空新都橋，係小貓既超強議價能力，用特平$100/人既價錢去新都橋!!稻城班車去康定已經要$130!!
晚餐同樣去左附近既四川餐廳，這一餐之後大家就應該會分開繼續自己既旅程，雖然只係短短相聚數日，但都覺得有點依依不捨呢。不過旅行就係咁，遇上同路人，同行一會，就要分道揚鑣，雖然唔可以一起走完整個旅程，但都會珍惜大家同行的一刻。
前言 Day0 Day1 Day2 Day3 Day4 Day5 Day6 Day7 Day8 Day9 Day10
0 留言:
發佈留言